COLLAR繼前年推出首張 EP《Unit 1201》後，相隔兩年，將於下月再推出專輯《PERSONA》，收錄七首新歌，包括《淚光》、《SKSKZAZA）、《刺客鬥死黨》、《初級成人禮》、《管理還管你》、《(almost) perfect girl》和《流浪足印》，其中第一首作品《淚光》將率先登場，為專輯揭開序幕。
相隔兩年再出專輯，COLLAR表示極期待，Marf謂當知道拍板出碟後，她專登回看《Unit 1201》，她說：「唔知點解好想快點見到新專輯面世，然後一次過睇新舊專輯。我覺得今次歌曲，會比較適合大眾，所以好期待觀眾嘅反應。」
Gao說：「兩年後再出碟，實在非常感恩，出碟並非容易，團隊同我哋都非常投入，傾盡全力。呢次大碟有一種成熟嘅感覺，上次係勇闖公路，今次就好似路途上遇到一啲事、成長必經嘅人生車站，感覺似續集。」
打頭陣的《淚光》將首播，歌曲旋律偏慢，有別於COLLAR節奏澎湃風格，歌詞記錄過去幾年COLLAR的經歷，Sumling說：「過去幾年，我哋經歷好多，有開心、有辛苦、有喊過嘅時刻，呢首歌將喊過後仲會發光嘅瞬間記錄低。每次喊完，我哋都會抹乾眼淚繼續行。呢首歌係講眼淚本身都可以係光，唔代表你輸咗，而係代表你仲有感覺，仲會痛，仲想好返。」
Winka指《淚光》的曲風是COLLAR初次嘗試，她說：「COLLAR就嚟五歲，呢首歌感性得嚟又成熟，我覺得好啱係頭炮作品。」今次7首歌之中，Candy表示最愛《初級成人禮》，她說：「我發現自己都幾適合慵懶感覺，呢首歌需要好放鬆、好慵懶感覺，所以錄音時好chill，完全跟住自己感覺去唱。
Day就最愛《(almost) perfect girl》與《刺客鬥死黨》，她笑說：「《(almost) perfect girl》歌詞好貼近我哋，好似寫我哋故事，亦好似好多女仔嘅故事，我覺得呢首歌會有共鳴。而鍾意《刺客鬥死黨》，因為係COLLAR初嘗試嘅曲風。」至於Ivy則最愛《流浪足印》，她說：「因為呢首歌喺我心目中，係屬於COLLAR嘅歌！」