陳詠燊最為人知的身份是《飯戲攻心》導演，他近兩年也開始做展覽策展人，新近的作品是在大館舉行的「拍住上——光影裡並肩馳騁的我們」。
如此多瓣數，原因是什麼？陳詠燊說：「我自己都同年輕人講，好難全職做電影，編劇死得啦，做副導演都唔係咁多戲開，要做第二啲工作賺收入係好合理。我自己好多心，由細到大都鍾意度嘢，入行冇幾耐，啲人同我講，Sunny咁多嘢講，做主持啦，我朋友嘅婚禮主持，好多都係我做。」
陳詠燊早年跟馬偉豪，寫過電影《新紮師妹》劇本，其後離開過電影圈一陣子，他說：「比較多人認識我，係網上寫愛情專欄，嗰時仲未入返電影圈，我偶像係陳慶嘉，佢好鍾意寫專欄，我覺得有專欄好有型，我學阿嘉。寫寫吓，營運返個人嘅創作，唔同嘅創作，其實個根係一樣，都係戲劇矛盾。」
原來陳詠燊不喜歡推工作，他說：「我好少推job，我好信緣，我做咗一啲好少錢或者做完後悔嘅project，之後會衍生一啲好美好嘅嘢，所以唔好推job，job係一個運，有人搵你，係一個luck。」
電影圈陷入低潮，但陳詠燊仍不放棄任何一個機會，他說：「05、06年我失業，冇乜嘢撈，嗰時幫一個本地動畫編劇，好少錢，一集寫好耐，一個月兩、三千蚊，我結果打電話俾老闆，話三個月嘔晒15集劇本出嚟，但一次過俾錢，我至少嗰幾個月都好忙，同每個月有幾萬蚊，其實做人最緊要有鬥志，迫自己忙，鬥志返嚟，其他運就嚟！」
更因為一個飯局，陳詠燊任職了幾年馬會，他說：「嗰時去咗老師飯局，隔籬有一個女士，佢客串做過演藝學院教師，正職係馬會廣播事務部主管。佢係我恩人，佢鍾意電影，講開《新紮師妹》，嗰時有隻馬『精英大師』，馬會有一條紀錄片要拍，搵咗我做，我好有心機度，佢哋好鍾意，開始將佢哋部門嘅job俾我。我再之後入咗馬會做，做咗幾年，營運返自己經濟，所以唔好放過任何機會，因為唔知之後會變咗啲乜嘢出嚟。」
《飯戲攻心》能拍成電影，亦幾經波折，陳詠燊說：「呢套戲最初係諗住sell俾電視台，拍六集劇集，點知唔中，跟住sell俾其他電視台都唔中。我好少祝人心想事成，因為如果我嗰次心想事成，當日電視台拍完就算。」
陳詠燊續說：「仲要第一次搵嘅電視台，拍完都冇人睇，我搵啲嘢搞吓咋！如果中咗，心想事成，拍完都唔知去咗邊。搵唔到電視台，好大打擊，冇人鍾意我啲嘢，點知中咗電影嗰邊，結果成為《飯戲攻心》電影。」因此陳詠燊很相信緣份和因果，以及蝴蝶效應。
https://youtu.be/ByQVTINGKIU?si=eiI6Deuy9VIxeBrt
https://open.spotify.com/episode/5lnnC1VOk6WHUl3zieMPQP
SpotiTalk @topicsbyspotitalk @hotak1999 @sunnyhahaha_chan
「Topics by SpotiTalk」全新訪談podcast節目《ENTER ENTER》，主持何德帶大家直入歌影視世界，角度有趣但不八卦，深入而又雅俗共賞，ENTER into ENTERtainment。節目逢星期日，於Spotify及YouTube同步上架。