周星馳為宣傳《功夫女足》，一日之內連續接受ViuTV谷德昭的《爆谷一周》和無綫黎芷珊的《一周星星》訪問，節目前晚播出，兩個訪問最令人引起興趣的，竟不是主持發問的問題，而是同場的劉嘉玲，說想周星馳和他丈夫梁朝偉一齊合作拍一套戲，嘉玲說：「我一直有個願望，一路都想佢（周星馳）同梁生拍一套戲。」星爺即笑說：「《430穿梭機》已經合作過！」黎芷珊即追問二人有否機會合作，星爺說：「冇嘢係冇可能。」
劉嘉玲隨即說：「拍番你哋最初嗰套，你同佢呢套底片去咗邊？」星爺說：「短片？我都搵緊，諗住問佢（梁朝偉）收埋喺邊。嗰齣戲我打贏咗，𠵱家唔見咗，咁你話邊個收埋咗？」
而劉嘉玲口中「最初嗰套」，其實是周星馳和梁朝偉未入演藝圈時，兩人是好友關係，當時他們一起拍一條短片，更是由周星馳自編自導。梁朝偉23年12月宣傳《金手指》，和莊文強一起接受谷德昭訪問，亦曾提過這條短片。
谷德昭原來也看過這條叫《李小龍打死壞人》的短片，星爺當然是演李小龍，偉仔演壞人，谷德昭笑說：「我記得係用交叉鏡頭拍，佢打沙包，然後打你。我記得好似睇過，𠵱家有條片有就發達喇，唔知道喺邊個手上呢？」梁朝偉當時說：「我有問過佢，佢話唔知去咗邊，大家未曾入行，唔知做緊乜，佢拍埋剪埋，仲要放俾我睇，我哋打嚟打去，我死咗，就係咁！」嚴格上來說，梁朝偉接觸第一個導演，就是周星馳，他也承認：「係喎！」問二人之後有沒有機會再合作，偉仔說：「我同星仔？真係唔知喎！」
梁朝偉和周星馳識於微時，他謂那時有一起去蒲，偉仔說：「但冇去追女仔，我哋淨係出去飲嘢，打吓保齡球，我嗰時已經覺得佢好好笑，大家去考訓練班，要做悲劇，我做完到佢做，我睇佢，咁好笑嘅，實死冇生呀，悲劇演到喜劇咁，嘩！得唔得㗎 ？走嗰陣，星仔話：嗱！我實冇問題，你實唔得！」但結果是偉仔順利考入無綫訓練班，星爺考不到，及後要戚美珍幫手推薦才能順利入到。
莊文強原來也曾試過撮合星爺和梁朝偉拍戲，但失敗，他說：「我搵過，但周星馳有三個要求，第一要好多錢，第二要求啲女好靚，第三要求要拍到佢好靚仔。真定假啊？你係咪推我！」
偉仔亦曾在23年紀念入行四十年的節目，提及和星爺拍的這條短片：「他要做好的人，我做被他打死，我問過條片在哪裏，他說不知道。不知道？不可能吧，是收起來！」
查實周星馳和梁朝偉入影圈後，從來未試過同框出現在一部電影。《豪門夜宴》和《玻璃樽》兩部戲，都有周星馳和梁朝偉演出，但兩人都是各有各演，沒有同場。他們於無綫時期，都主持過兒童節目《430穿梭機》，但不是同期，偉仔是82年任主持，很快就調走往拍劇，星爺是83年加入，至87年才離開，做了四年主持。
兩人雖不是同期主持，沒有交接，但85年《430穿梭機》1000集的特備節目，梁朝偉任嘉賓，和星爺同時出現。節目中，星爺和偉仔任拍檔，和張國強及龍炳基玩對賽搶答問題，小朋友主持問他們一條「1+3+5 +7+9」，星爺作狀提水，偉仔才答「25」，兩人極有默契，這個場面，是他們罕有的公開同框演出，但已是足足四十一年前。另一次同場，是梁朝偉於83年演出劇集《北斗雙雄》，其時他是男主角，周星馳也有份演，不過是閒角，當時周潤發也在，是三人極罕見的同場。除《北斗雙雄》，同是83年的劇集《再見十九歲》，梁朝偉照樣是主角，在第20集，他和周星馳也有同場，星爺飾演綁匪，兩人這次同場有不少對白，偉仔要求星爺不要撕票殺他。
ENTER ENTER 是 ENTER into ENTERtainment，直入娛樂核心，娛樂不單是消閑，也可以認真去看，ENTER ENTER 會認真對待娛樂，看清娛樂。
https://www.facebook.com/profile.php?id=61590635431086
https://www.instagram.com/enterintoenter/
https://www.threads.com/@enterintoenter