最近成為政圈話題人物嘅經民聯立法會議員鄧銘心，以全議會最高薪、7.18萬請議員助理。不過，相關報道曝光後9日，議助突然離職，鄧銘心解釋係為咗更有效善用資源。
呢位最高薪議助為經民聯主席、前工程界立法會議員盧偉國工作多年。今屆就幫同樣係工程師嘅鄧銘心擔任辦公室總監。有傳媒最近刊登頭10位最高薪議助嘅統計，不過相關報道出街唔夠10日，呢位嚟自鄧銘心辦公室嘅最高薪議助就突然離職。
今日有傳媒引述消息，話鄧銘心前排失言，但佢明明擁有身價最高嘅議助，令有關方面相當關注佢嘅團隊表現。最終促使鄧銘心同該名議助協商後「和平分手」。《am730》向鄧銘心查詢有關消息係咪真確，佢只係回覆為咗更有效善用資源，辦事處正進行人力資源重組，正招聘辦公室主任、政策研究員同議員助理。
鄧銘心上個月喺行政長官李家超同議員嘅對談交流會上，曾經向李家超反映一眾議員打風之後落區執樹枝、打卡影相，呢種「打卡歪風」係此風不可長。其他議員事後批評鄧銘心嘅Facebook都充斥好多落區、開會嘅相，甚至當日打風後都有「打卡」。鄧銘心再解釋佢係「被要求」打風後落區交相。 原文刊登於 AM730 https://www.am730.com.hk/本地/1048540/ray-online-最高薪7萬議助突離職疑-見光死-鄧銘心-為更有效善用資源?utm_source=yahoorss&utm_medium=referral