晚安莉莉將於九月有專場演唱會，Sinnie說：「今年好開心，騷好多，作為一隊band，最開心出live，同埋寫歌，阿雞最唔鍾意玩cover，街知巷聞。」阿雞即說：「騷多咗，對自己歌需求會多咗，有自己歌，會越玩越熟，經驗值慢慢增加。」
Sinnie說：「冇諗過咁快搞專場，我自己覺得舊年搞過，有啲攰，歌又未夠多，可能今年自己歌多兩、三隻，覺得開多個騷會否得？但有一次出騷，完咗fans喺台下大嗌開專場，我話咪開咗，佢哋話再開，轉頭經理人講話可以搞專場。我開頭比較擔心，但整理好個rundown，現在好期待。」阿雞說：「搞專場係好，有目標push到我哋。」
晚安莉莉樂隊有兩個主音，分別是Sinnie和阿雞，對此Sinnie說：「一開始認識晚安莉莉都係Sinnie為主，當出第一隻歌《當昨日凝視着我》，係阿雞都有份唱，最呈現阿雞嘅狀態，係呢首同《唯獨不可敗給名為「我」的你》。寫歌詞嘅畫面，有兩個vocal要有原因，點解唔係女聲，要用男聲，因為前面有女仔角度，後面都想有男仔嘅角度去講。」
Sinnie同時是Lolly Talk和晚安莉莉的成員，兩者風格很不同，她說：「係關星座事，細個到𠵱家都鍾意睇星座，自己太陽星座係山羊座，成日見到嘅keyword係矛盾，我鍾意嘅嘢永遠係九唔搭八。」阿雞即說：「我要幫佢講說話，畢竟佢都係一個女仔，一直以來同我哋夾band，我哋band嘅成員都比較麻甩，其實我哋男仔成員好少女、好扭擰，Sinnie要負責麻甩。」Sinnie說：「佢哋負責行為麻甩，心態少女；我係負責心態麻甩，行為少少麻甩，外貌少女。」
阿雞說：「佢喺我哋呢個空間，唔係好做到少女，我覺得佢喺第二啲地方，可能似返個女仔。」Sinnie說：「要睇吓乜嘢位，有啲位佢哋照顧我，我可以做返軟弱一面。」
原來Sinnie小時並不喜歡着裙，她說：「我細個好唔鍾意着裙，大個覺得夾band好型，都未鍾意着裙，去到大學畢業，有段時間鍾意睇日系嘅嘢，之前我focus嘅音樂係香港Cantopop，通常女藝人都係型啲。直到我留意日系穿搭同流行文化，覺得着裙都幾正。」
晚安莉莉的成員平時會做什麼呢？阿雞說：「今年農曆新年，團年聚埋食飯，一直大家之間話題離不開工作，呢餐飯講明唔准講公事。」Sinnie笑說：「已經喺我屋企，見唔到樂器，結果都係講音樂。我有研究過，我哋好少人有音樂以外喜好，閒時唔聚埋一齊，會睇動漫同聽歌。水金有養貓，小伍有養寵物，大家有唔同喜好，但最link到大家，都係音樂同動漫，仲有日本。」阿雞說：「我哋係將興趣變咗工作。」Sinnie也同意：「幸福㗎，好多時擔心興趣變咗工作，會討厭自己嘅興趣，但暫時我哋六個未有呢個傾向。」
https://www.youtube.com/watch?v=lj2apPiw44c
https://open.spotify.com/episode/6yg2bTTDl5T3pzz78BLJnH
@spotitalk @topicsbyspotitalk @hotak1999 @goodnight.lillie
「Topics by SpotiTalk」全新訪談podcast節目《ENTER ENTER》，主持何德帶大家直入歌影視世界，角度有趣但不八卦，深入而又雅俗共賞，ENTER into ENTERtainment。節目會於Spotify及YouTube同步上架。