網約車服務愈趨盛行，不過前財政司司長曾俊華近日分享，遇到唔識講廣東話嘅網約車司機，亦好似直頭冇聽過香港幾十年嘅老牌屋苑，質疑係咪適合照樣接單。民建聯立法會議員植潔鈴就話香港有咁多屋苑，一個屋苑有幾十年歷史都唔代表人人聽過。
植潔鈴主動喺社交平台回應事件，佢話前財爺近日分享嘅經歷，其實帶出幾值得思考嘅問題，就係網約車愈嚟愈普及，應該用咩標準衡量服務質素。對於曾俊華話司機唔識路，要全程跟住GPS導航。植潔鈴話司機未聽過某個屋苑名，未必等於唔熟香港道路。而且網約車用GPS同即時路況導航，本來就係服務模式一部分。但佢指出遇到塞車、封路、導航失準等等，司機仍要有基本判斷同應變能力，安全駕駛始終係首要條件。
至於曾俊華話遇到唔識講廣東話嘅司機，植潔鈴話與其討論司機一定要識邊種語言，佢反而建議平台加入「語言偏好」選項，等乘客按需要選擇廣東話、普通話、英文或「無特別要求」，由平台盡量配對；亦可以善用即時翻譯功能，減少溝通上嘅麻煩。植潔鈴總結話科技改變咗出行模式，衡量服務質素嘅標準，亦可能要跟住轉變。
原文刊登於 AM730 https://www.am730.com.hk/本地/1049153/ray-online-曾俊華遇普通話網約車司機不懂老牌屋苑-議員-屋苑有幾十年歷史唔代表人人聽過?utm_source=yahoorss&utm_medium=referral