昨晚（9月2日）播出的首集邀得江若琳（Elanne）和老公蕭唯展（Oscar）打頭陣。Elanne表示與老公婚前已經想生育，Elanne分享：「我哋一直以為生仔好容易，以前啲人好似順理成章一結完婚，下個月就會有咗，我都以為我哋係咁，應該好容易可以懷孕。」Oscar指婚後同居時更預留了房間畀BB：「我哋間屋搬咗入去嘅時候已經整定間BB房，但係最後嗰個BB房係擺植物，擺咗好多年但係都未有BB，其實我哋係贊成任何時候都好，生得出就生。」
面對二人世界變三人世界，Elanne感恩現在非常幸福：「本身我哋兩個都係由朋友開始變咗做夫婦，本來我同佢都係好好嘅best friend，而家只不過係多咗個仔，變咗三個best friend，幾好㗎。」朱薰隨即笑言反駁：「咁你識多幾個friend咪得囉，使乜特登陀10個月生個friend出嚟啫！」Elanne：「唔同啊依個friend第時會照顧我吖嘛！」
Elanne再放閃：「琴晚老公先send咗個訊息俾我，係半夜三更，佢話我人生最大嘅成就係同你結婚同埋生咗個仔！」觀眾主持齊齊嘩然，朱薰笑言：「佢知道今日要上呢個節目先send架！」老公Oscar：「知道有個節目要上，不如冧吓佢囉，等佢自己講囉，點知佢又真係依家講！」