方健儀日前接受陳志雲YouTube的《志雲頻道》訪問，她最初在無綫是做外勤記者，後來才做主播報新聞，任職無綫前，曾在港台做記者。06年入無綫，有否不適應？她說：「我以為之前做咗六年記者，好似好勁，或者好有經驗，其實由電台去電視，係完全兩個範疇。電視我最唔習慣，係要以畫面為先。我最初唔知，係平鋪直敘。後尾我就知點解，電視永遠係畫面說話，例如一個火球嘅畫面，就勝過你千言萬語。」
「我睇返自己第一個扒（現場報道）係不堪入目，好恐怖，做扒真係慢慢訓練，第一個扒，嗰陣時冇智能手機，要訓練自己要睇得順眼，別人先開始睇你順眼。所以係跌跌碰碰成長，個樣唔得之餘，仲試過食螺絲。有一個扒，食咗20次，喺高等法院門外，錄嘅，但嗰啲嘢好難背。」
「以前做電台，係自己一個人採訪，但係你做電視，唔慣係有一個團隊，團隊有好有唔好，有cam man，有工程，我老公都係工程直播，唔好處，係你要好靠大家嘅努力，有啲嘢你控制唔到，例如返到嚟有啲唔係你想要嘅畫面，所以學識點樣比一個清晰嘅指示。」
方健儀任職無綫時，認識了同在新聞部做工程的丈夫洪楚恆，她笑說：「我丈夫冇英文名，佢以前啲同事叫佢做Billy，Billy恆，啲鹹濕嘢嚟㗎，佢拒絕呢個英文名。」兩人怎開始？她說：「我知道佢追緊我，嗰晚約佢食飯，食飯之前要講六點半新聞，嗰日改我哋嘅稿，係senior嘅編輯，佢話我冇news sense，話我冇judgement，其實佢話得我啱，喺個大廳嗰度，有少少氣頂，大家都聽到，咁我好唔好受。我忍住，唔好喊，人哋鬧你，有時就係想你喊，我唔想喊，我要頂住。」
「嗰日放咗工之後，完全冇事，約咗佢食飯，嗰陣時坐車，佢歡天喜地同我講嘢，但我一句都聽唔入耳，因為俾人鬧，然後去到一個位，我就同佢講：『唔好意思，我今日好唔開心，因為我啱啱俾人鬧，鳴嗚嗚⋯⋯』因為喺架車，一個好受保護嘅環境，又冇人睇到，嗰吓個mood到，咁就喊，收唔到聲，忽然間有隻手搭過嚟，佢就話：『唔好喊啦，無論如何我都會支持妳。』我繼續喊，我冇為意佢隻手捉住我，我話：『咦！你隻手咩事呀？做咩乜捉住我隻手？』佢話：『唔拖都拖咗，拖埋落去啦！』我話：『咁無賴嘅！』其實就係咁樣開始。」
方健儀如此形容他丈夫：「我先生係一個好純品嘅人，眼細細，肥肥哋，圓軲轆咁，嗰時我諗我男朋友係高大威猛嗰啲，佢唔係我心目中理想，後尾我都要承認一樣嘢，理想同現實係兩碼子嘅事。我好欣賞佢嘅勇氣，第一拖，同埋佢好細心，之前一齊試過去大排檔食飯，嗌罐汽水，汽水凍嘅，我一擺低罐汽水，佢就問阿姐有冇紙巾。嘩！呢個男仔都幾細心，我之前啲男朋友都冇呢啲嘢。」
問無綫新聞部有沒有爭風呷醋的事？她說：「喺我哋嘅年代係唔多嘅，我知道你想問乜，真係聽到一啲男男女女，係喺我走之後，我都係聽返啲舊同事講，我冇親身睇過。點解我報到新聞，因為嗰陣時好多花旦離職，有啲做公營機構，突然間走咗好多報六點半新聞嘅，所以有空缺我頂上。」
陳志雲更爆了一單新聞部秘聞：「嗰時有一、兩位女主播唔係sponsor，但好鍾意戴名牌，例如耳環，個logo係睇到晒，本來都冇留意，但驚動到最高層，唔係我，再高啲，至高無上，『佢做乜着呢啲衫？佢點解要戴呢啲耳環？』，後來係下咗一個旨意，再唔可以咁做。」
方健健更提起十五年前的龜波氣功事件，當時她直播報新聞，竟做出《龍珠》龜波氣功的手勢，她說：「我想講其實好驚，唔知嗰晚食咗啲乜嘢，咁沙卜，嗰晚係臨時臨急即興，去到第三節前嘅廣告，習慣要睇稿，嗰單係講日本虛擬現實博覽會，有講龜波氣功，我仲問FM，請問龜波氣功係咪咁樣，我驚做錯咗係會俾人笑。咦！我好唔好整個龜波氣功嘅動作呢？因為嗰陣時我哋改革，係想輕鬆活潑，我就腦交戰，魔鬼與天使，究竟做唔做，死就死，做啦！」
「嗰時恃住自己係恆常嘅新聞報道員，唔會因為咁而切換我啩。好，做！做完之後嗰晚好大迴響，啲討論區洗咗版。嗰晚心諗死啦，其實新聞部一向要低調，想我哋平平實實樸樸素素，結果冇收電話，到咗第二日返工，冇嘢，咁我就當過咗骨，冇鬧已經當贏。」
ENTER ENTER 是 ENTER into ENTERtainment，直入娛樂核心，娛樂不單是消閑，也可以認真去看，ENTER ENTER 會認真對待娛樂，看清娛樂。
https://www.facebook.com/enterintoenter/
https://www.instagram.com/enterintoenter/
https://www.threads.com/@enterintoenter