主持人何德第13集請來JFFT的雞翼和良少作嘉賓。JFFT一直比較少做專訪，雞翼說：「真係好耐冇接訪問，自己又冇整Q & A。」近日的歌謠祭令JFFT人氣再爆升，良少說：「完全feel到，我哋每日做直播，歌謠祭前實時觀看人數平均5000，歌謠祭之後係5000至10,000。」
良少笑說：「呢個現象好快完，差唔多回落。」雞翼也說：「我哋有少少想！」良少解釋：「l don't care！對我哋嚟講，實際觀看人數多幾千，分別不太大，但壓力會多咗少少。」雞翼說：「少返啲會舒服啲。」良少謂：「人多咗，留言區風向偏向認真咗啲。」雞翼認同：「好多未係咁認識我哋風格，有時講啲嘢諗住鳩搞吓，講完咗啲嘢，我都唔記得咗自己講過乜，現在少少要諗清楚先講，要調整吓。」
良少說：「自己都有個責任要就返住，目標令新嚟嗰啲人，可以融入多啲。」雞翼說：「嗰時我哋都有瀨吓少少嘢，現在人數多咗，有啲未係咁多接觸我哋，一定會有啲誤解。」良少謂JFFT一、兩年前是特別多公關災難：「嗰時未適應到嗰個人數，調節唔到，喺鏡頭前做咗好多公關災難出嚟，呢一年已經慢慢適應咗，就返住就少啲。」
今年是第二次搞歌謠祭，迴響是否比想像大？良少說：「冇想像過咁樣嘅迴響，上次歌謠祭嗰四首歌都係好聽嘅，但冇試過上榜，我哋幾個圍威喂好開心。今次好明顯係衝破咗個圈，去咗少少枱面級數。」雞翼說：「我預期會多人睇過上一次，但冇諗過咁誇張，多咗一啲完全唔睇嘅人，都想了解吓發生乜事。」
雞翼2017年經良少介紹加入JFFT，做過一系列《單打毒鬥》的片，良少說：「雞翼加入有好多因素，首先我識佢，讀書嗰陣一齊做功課，feel到呢個人好有幕前表演慾。佢仲識畫畫同graphic嘢，我哋channel就係缺少呢樣嘢，於是問佢有冇興趣玩。點解會有《單打毒鬥》，因為我哋都好鍾意韓國綜藝節目《無限挑戰》，所以我哋想做類似嘅嘢。點解係我同雞翼拍，因為另外兩個要返工。」
雞翼說：「呢個都係我加入嘅契機，床哥嗰陣要返工，米爺就返緊機場，係努力上班人士。良少想拍嘢，嗰陣搵咗我傾，傾傾吓大家都有拍綜藝嘢嘅心。」
JFFT未成名時，是如何撐下去？良少說：「畢業之後其實收入不高，開頭搵唔到工，返吓part-time，返下Pizza Hut。後尾搵到工，都唔高人工，頭三個月試用期，月薪九千蚊，都要俾studio租，大家夾。但嗰期個人冇乜使費。冇乜太多興趣，又冇女朋友，係有少少衰仔，冇俾家用。諗返起，辛苦又說不上辛苦，我三餐都夠比，車錢有，但冇儲錢。」
雞翼說：「我兩個階段，最初期喺第一個studio，係比較黐線啲，因為嗰陣我冇工返，基本上我喺嗰度長stay，等到夜晚九點開直播。食飯都唔夠錢，買一個三餸飯，分三餐、兩餐食，車錢又唔夠你成日來回屋企，真係好拮据。嗰陣人少少，開台都幾開心。第二個階段開始返工，我哋studio喺荃灣，我嘅返工地點係柴灣嗰邊嘅沙灘，朝早五點幾起身，跟住搭最早嘅地鐵過柴灣，再轉巴士返工。到放工喺柴灣返嚟studio，嗰陣覺得返嚟係爽，直播先係最爽，想放棄返工多過放棄直播！」
良少說：「我冇放棄原因，係我幾enjoy一班friend有個竇一齊玩，直唔直播拍唔拍片都冇所謂，實際enjoy位係一班friend聚埋一齊玩，打吓牌，完全冇諗過放棄。」
JFFT的突破位，是哪一個時期？良少說：「係第一次搞騷，喺新光戲院搞《白卡·英雄》，800人，嗰陣識咗啲朋友，叫我哋搞騷，其實算係fans meeting，好多同台下觀眾互動，玩遊戲，又舞台劇，又唱歌，搞完嗰個騷，成個channel熱鬧咗。」
雞翼說：「每一次搞完騷，就會多咗人睇。仲有公關災難之後，都會突然之間多咗人睇。」
https://youtu.be/qf9_Kl3qcYs?si=r7kZg6_NWHnG6vTq
https://open.spotify.com/episode/20PGRezOGnLGDLQViiPyiC
「Topics by SpotiTalk」全新訪談podcast節目《ENTER ENTER》，主持何德帶大家直入歌影視世界，角度有趣但不八卦，深入而又雅俗共賞，ENTER into ENTERtainment。節目逢星期日，於Spotify及YouTube同步上架。