鄧兆尊日前接受Son姐的YouTube節目《與Son對話》訪問，問及作為粵劇名伶新馬師曾的兒子，有沒有壓力？兆尊說：「好大影響，阿爸教嘅嘢，同年紀嘅人教唔到，我10歲已經識咗人20同30歲識嘅嘢。因為我哋每晚要同佢傾偈，每晚傾到三、四點先放你返房瞓，第二朝早七點先起身返學，所以由細到大養成咗個習慣，瞓三、四個鐘就返學。」
兆尊10歲時，父親已跟他講道理，他明白嗎？「佢係由淺入深，開頭係同你講拍戲嘅嘢，播啲粵語殘片俾你睇，呢個位有乜嘢穿崩，跟住慢慢講做人嘅道理。」祥哥對你最大的影響是什麼？「教我睇通晒個社會係點樣。」
父母的相處是怎樣？兆尊笑說：「撲朔迷離，我哋細路仔嗰陣時覺得，你係一個咁有智慧嘅男人，點會搵一個咁樣嘅女人：跟住答我：『夫妻呢，無冤不成夫婦，一定有好大淵源，大家一定有啲嘢先至成為夫妻，將來你拍拖就明點解。』」
兆尊小時候原來有被體罰，「打到20幾歲，企喺度打㗎，啲武器好犀利，隨手攞嘅．我會乖乖哋俾佢打。媽媽希望我哋四個幫佢爭返啖氣，爸爸之前有三個太太，都有三個仔，嗰三個大佬同我哋都friend。媽媽希望我哋四個之中有一個有啲成就，可以同佢哋有啲抗衡。」
兆尊求學時，都不想人知道他的身份，「我哋唔鍾意俾人哋知呢樣嘢，因為會比好大壓力屋企，冇俾人知，就算做錯，都唔會影響屋企。」兆尊更不想去加拿大讀書，「我唔想去，被迫㗎，我阿媽係一個好講道理嘅人，佢會俾你揀，我阿媽話：『阿仔啊，我希望你將來有成就，咁我俾兩條路你行，你是但揀一條，一係你去外國讀書，一係你去做黑社會！』咁即係唔使揀，咁我問點解要做黑社會？佢話：『你做黑社會，都可以控制好多嘢。』佢可能用呢個方法特登逼我去。」
兆尊謂父親是會用智慧去化解問題的人，「佢哋年代嘅明星，真係有一種星味，我喺加拿大撞過鄧寄麈，我見佢喺書局度，個人側晒咁挨住，同個女仔傾偈，問佢得唔得閒同佢去飲下午茶，嗰個女仔終於俾佢氹掂咗，同佢飲茶，嗰陣時佢應該60零歲，佢嘅魄力同搞笑能力，我係到今日都記得，氹咗一個幾鐘，應變能力好強。」
「我哋自細睇到好多人哋睇唔到嘅嘢，例如每年嘅東華三院籌款活動，我細個嗰陣唔係好明，點解每一次陪我阿爸去籌款活動，身邊都係有一個好高級嘅警司，同一個好犀利嘅社團代表，而呢兩個人係會好熟，仲要係好friend。每一次都唔同人，一定都有呢啲角色喺側邊，點解咁奇怪。我細個會諗點解正邪會行得埋，仲要咁friend嘅呢？原來呢個世界冇一個絕對定律。」
「試過有一個人攞一袋鑽石嚟比佢，賣俾佢，唔知幾多錢，有10幾粒鑽石，嗰時我差唔多20幾歲，阿爸叫我揀兩、三粒啦。我俾人鑲石嗰陣，個人話啲石有真有假，可能裏面八成係假。我同佢講，你俾人呃咗啦，佢話：『算啦，有時做人唔好咁計較。當你有能力嗰陣，幫到人就幫，將來人哋會幫返你。』」
兆尊11、12歲時更發生過一件搞笑事情，「有啲靚女同好出名嘅人搵過我阿爸食飯，以前有一個好出名、好好身材嘅艷星，請佢去屋企食飯，阿爸搵咗我去擋槍，帶咗我去艷星嘅屋企，佢住堅尼地道，我最記得，去到佢屋企撳鐘，開門睇唔到嗰個姐姐，因為我嘅高度，我一望上去就睇唔到嘢，因為太過突出。跟住入去食飯，食咗一味餸，我阿爸就走，話阿仔聽日要返學，返到屋企，俾阿媽盤我，問我去咗邊。我知阿爸推過好多女星，呢個搵過好多次，推唔到，個艷星係着套喱士睡衣出嚟，絲質嗰啲，一個個窿。」
「呢樣嘢後來幫到我，我做咗呢行之後，曾經有個艷星叫我去佢屋企，幫佢整漏水嘅嘢，我唔識整，我話我試吓啦，去到佢屋企，又有類似情景出現，我睇咁蹺，又係喱士睡衣，咦，到我喇喎。我入到佢屋企，佢同身邊工人講：『呢個鄧生，佢同我冇嘢㗎！』跟住嗱嗱臨我整完啲嘢就走。妳同個工人解釋咁多嘢做乜呢？梗係驚呢個工人同個男主人講啲無謂嘅嘢，如果係冇嘢，就着返件正常嘅衫，有乜理由着件喱士睡衣。」
ENTER ENTER 是 ENTER into ENTERtainment，直入娛樂核心，娛樂不單是消閑，也可以認真去看，ENTER ENTER 會認真對待娛樂，看清娛樂。
https://www.facebook.com/enterintoenter/
https://www.instagram.com/enterintoenter/
https://www.threads.com/@enterintoenter