袁文傑除了是一個藝人，近年他努力發展自己的YouTube 足球頻道，在網上聲音直播旁述足球賽事，世界盃期間，眾多直播中，袁文傑的頻道甚多人看，決賽一場，他更是香港YouTuber 做直播旁述最多人看的一個。
到8月英超開鑼，文傑更是火力全開，尤其是專做阿仙奴的賽事，以今屆為例，阿仙奴踢了八場波，包括社區盾、英超、歐聯和聯賽盃，文傑除了聯賽杯沒做直播之外，其他七場都做足，十分投入。
剛剛週六晚一場，阿仙奴開季各項賽事七連勝，作客白禮頓的英超，袁文傑在YouTube開直播聲音旁述，結果阿仙奴慘敗0:3，迎來今季首敗。評述完賽事，文傑繼續開live，分析愛隊表現，當中有批評前鋒約基利斯今場踢得不好，結果引來留言反擊，令文傑動氣，覺得被人夾埋針對，立即中斷直播。
去到直播live 尾段，文傑不悅地讀出網友即時留言：「將軍澳阿迪達話：『文傑兄明顯唔鍾意約基利斯，有偏見！』嘩！你咁樣講話我有偏見呀，各位巴打，當我批評親約基利斯，就話我有偏見，我唔講偏見，講純粹控球，我唔明點解得得吓，成個跣低，個波又失埋，你解釋我聽？除非你又想撩起一啲事件，如果唔係你應該知道我嘅脾氣，你唔夠膽會留一句咁嘅留言。」
文傑繼續不悅地說：「紅色人就話：『你係對佢有偏見吧！』嘩，又有一個喎，睇嚟你哋夾埋入嚟喎！係咪呀？仲有一個話：『唔係偏見，事實係！』睇嚟大家夾埋個喎！唔講啦呢場直播，我收線啦，好唔好呀？」說罷立時cut直播。
文傑氣憤中斷直播，引來網友留言支持和批評，「唔使勞氣，啲人玩嘢，支持！」、「難免樹大招風」、「搞事嗰班，我哋咪唔侵佢玩囉！繼續加油」、「好心控制下你EQ啦，已經冇嘢撈搞到要日日喺度講波，就唔好發小朋友脾氣啦」、「G14 係唔夠好，但咁樣鬧法，就好似有啲唔尊重了」。
留言回應不斷，令文傑事後在 YouTube 直播片的留言解釋：「我冇勞氣，我只係唔知一班乜嘢人，擾亂氣氛，擔心起上嚟，至話講到夠。況且森林又差唔多出場，唯有留番賽後評再傾。」
ENTER ENTER 是 ENTER into ENTERtainment，直入娛樂核心，娛樂不單是消閑，也可以認真去看，ENTER ENTER 會認真對待娛樂，看清娛樂。
https://www.facebook.com/enterintoenter/
https://www.instagram.com/enterintoenter/
https://www.threads.com/@enterintoenter