主持人何德第14集請來ROVER四子作嘉賓，亨仔日前做地盤兼職，他說：「我由細到大都做好多粗重嘅part-time，做吓搬運嗰啲，都冇乜嘢，搵食囉，用part-time輔助吓ROVER呢邊嘅收入，我覺得冇問題，公司又冇乜意見，得閒你咪出去做，咁都幾好，幫補吓。」
亨仔續說：「呢一類型工種，由細到大都做，接觸唔同嘅階層，同唔同人相處溝通都有唔同方法，呢一樣係學得最多嘅嘢。同埋出嚟做嘢，最好唔好怕蝕底，做邊一行都係。」
ROVER四子經常打打鬧鬧，希晉說：「我哋經常串嚟串去，呢啲嘢係維持我哋關係，我哋四個好似拍緊拖咁，四個關係需要長時間對住大家，要夠熟先至可以咁做，唔夠熟，串一句就會發脾氣。」
有沒有試過真的嬲？亨仔說：「希晉有一次差啲真心嬲，發生喺長洲，佢坐咗喺床邊，我嗰日腸胃差，食咗好多嘢，周圍放咗好多次屁，咁啱我企喺佢隔籬，我唔為意，咁我一嘢放，咁啱放正喺佢個鼻度，成個氛圍feel到佢開始躁，佢話：『又放，放夠未呀？好臭呀！』」希晉說：「我已經好躁，我哋返到去，隻曱甴已經喺間房度，我喺床度玩電話，已經好迫，阿亨放咗一次我已經算數，擰轉面，跟住佢無端端放完之後話：『死啦，我feel到今次好臭！』我跟住唔知去邊，行去邊度都唔係，成浸屎味，真係好臭，我真係嬲！」
ROVER的新歌《白日夢之旅》由成員Kim填詞，他說：「亨師兄今次話想寫多啲畫面嘅嘢，不如寫下啲詩意畫面，唔好太多好認真好實在嘅嘢。其實天氣我係好鍾意寫，用天氣形容我哋四個，我就諗到雪雲霧雨四樣嘢，四樣嘢都係唔同形態，但其實都係水。我哋四個都係唔同形態嘅人，呈現出嚟都係同一滴水，想講呢樣嘢俾大家聽。」
Jason說：「Kim寫詞係好有佢嘅style，我哋好多時嘅歌，都會問佢有冇興趣寫詞，鼓勵吓佢。聽返嚟嘅feedback，都覺得佢寫嘅詞幾好。」
說到發夢追尋理想，Jason說：「原來我哋𠵱家做緊嘅嘢係好奢侈，唔同你返一份正職，付出幾多時間就收到幾多人工，我哋依家做緊嘅嘢，付出幾多，唔等於有相等嘅回報。但係我哋奢侈嘅位，係我哋得到更強大嘅嘢，可能係觀眾，一啲人嘅認同，我諗返其實係好難，好靠我哋去相信呢件事，我都幾慶幸自己仍然可以做緊呢樣嘢。如果你唔夠相信，或者渣啲，一早已經唔做，簡簡單單搵份工。」
有否一刻開始不相信這件事？Kim說：「唔係一刻，係每一日。呢樣嘢係堅持嚟，當你每一日諗住放棄，你每一日都係仲做緊，呢樣嘢好難，訓練到我哋自己嗰種毅力同堅持，只要你信，幾唔想做，每一日都會keep住做。」
https://youtu.be/YbyNXSSbZu4?si=xH8ynijvfKBNq2GH
https://open.spotify.com/episode/3LesM8IFssl7XPjIEeiGiy
「Topics by SpotiTalk」全新訪談podcast節目《ENTER ENTER》，主持何德帶大家直入歌影視世界，角度有趣但不八卦，深入而又雅俗共賞，ENTER into ENTERtainment。節目逢星期日，於Spotify及YouTube同步上架。