今日(22日)網上流出一段打交片段，顯示於元朗坑尾村輕鐵站月台，片中所見有兩名男子疑因打尖問題大打出手。片段一開始已見一名戴口罩白衫男子被紅衣青年打到瞓地，白衫男在地上掙扎，紅衣青年一度跨過白衫男欲走入車廂逃走。白衫男立即起身指罵：「你知唔知咩叫排隊呀？」惟車門未有關上，紅衣青年返回月台隨即爆粗反駁：「黐X線，我排緊隊架(㗎)，你冇L嘢呀？」車廂內有乘客大喊：「快啲閂門入嚟！」亦有乘客喊道：「唔好入嚟打交呀大佬！」
紅衣青年走出月台向白衫男施拳，拳拳到肉，兜錘窩面，紅衣青年又起飛腳，白衫男節節後退。紅衣青年打到甩鞋，車門最終關上，片段就此結束。
片段引起網民熱議，有網民留言：「白色衫夠正義，而（依）家好小(少)人咁出聲」、「拳怕少壯」。亦有網民質疑：「坑尾村都仲有得打尖」。
