MIRROR的Alton日前接受渾水的SpotiTalk訪問，他怎看MIRROR成員不同風格？Alton說：「我哋嘅FING小組嘅風格會近啲，係因為成長背景，始終大家都係跳舞。好簡單，即係你鍾意踢波定打波，冇得去扮自己鍾意打波，扮唔到嘅，可能有啲人得，我哋冇咁叻。你做你鍾意嘅嘢，風格就喺度。」
MIRROR往後的發展會怎樣？Alton說：「呢個牽涉我哋未來嘅問題，我就𣎴便多說。但係你話嚟緊每個人係咪有各自方向？呢個係必然。其實每個人都會有自己方向，我哋本身就係十二個方向嘅人。」
怎維繫MIRROR成員間的關係？「其實一定難，大家都咁忙，你都唔知你屋企人噚晚食乜！人一定係有距離，只要大家各有各忙，就唔知大家做乜。做團嗰陣，十二個人會喺埋一齊，唔係做團嗰陣，可能拍劇、拍電影，或者走埠、拍綜藝旅遊節目，十二個一定係工作行先，但係有幾多機會update自己工作狀態呢？大家都主要係因為工作而靠近。」
現在宣傳歌曲的流程是怎樣？Alton說：「我哋公司制式上比較開放，冇兵法㗎，其實睇吓點樣做到件事，同你接唔接受到。」有試過迷失嗎？「梗係有啦，我相信每個做呢行嘅人都一定有，就算唔係呢行，香港嘅朋友們應該冇乜人冇逆境。你返寫字樓，都可以唔開心，你做零售，都可以好kick，我哋呢個行業接觸咁多人，內耗係新手村嘅關卡，當你越早離開呢條新手村，你就越叻仔。」
Alton自小已愛Rap，聽LMF，「我接觸佢哋時候係小學，當時純粹覺得好cool，好快呀啲歌詞，甚至唔知乜嘢叫Rap。嗰時好細個，屋企唔比我聽，因為粗口，同埋唔容易聽到，要有碟。我要問人借，我要等屋企冇人先可以聽，然後我哋會有幾個人討論隻歌，嗰時真係小學，會問大家識唔識唱，唱得晒，就好似過晒關卡。後尾大咗先知原來Rapper係有嘢講，我最respect係敢於表達同暢所欲言。」
「香港係一個好得意嘅地方，拍戲嘅去拍戲，唱歌嘅去唱歌，香港係乜都可以做，只要你有人氣，有流量。我自己最喜歡Rap、創作，做演員同綜藝都係睇題材，最kick應該係唱歌，鍾意得嚟又唔係好叻，但係期望自己進步。」
演藝圈是否比前艱難？「絕對係。我唔知出面個圈有幾艱難，我哋始終喺個電視台溫室入面，被人接觸嘅機會一定多啲，但自身艱難期一定有。現在乜嘢都講流量，𠵱家你出個po，就算自己唔care，公司會care，客戶會care，有幾多個like，有幾多個comment，有幾多個轉發，大家用嗰樣嘢嚟做度量衡。首先可能關自己事，自己啲嘢hit唔中大家想要嘅嘢，但同時間可能根本已經大家轉咗，未必係個個玩Instagram、YouTube，甚至Threads，其實大家會花幾大力水去玩呢啲平台呢？個世界不斷變緊，流量嘅計算方式，係咪得嗰種呢？」
Alton怎分配時間營運自己的社交媒體？他說：「我哋公司係冇幫你營運嘅服務，佢哋最多係，你自己『營營吓』，某啲嘢覺得唔係好恰當，『喂，你嗰張相好似樣衰得滯喎，素顏得滯喎，整走佢啦，執一執都要啩！』適當嘅monitor會發生，但係主要都係自己玩。咁主力玩咩？我同大家都一樣，Instagram同Threads。」
是否恐懼Threads這個平台？Alton說：「喺我心目中，Threads係鬼屋嚟嘅，你入咗去，你預咗俾人嚇親，你唔ready唔好入去，唔好排隊，你入得去，就預咗有好多意想不到嘅嘢發生。啲嘢可能唔關你事，亦都可能關你事，我都算係俾人討論嘅單位。入面啲嘢係恐怖，過到就過，但過唔到都唔好自責，過唔到就detox吓，我覺得呢個係唯一出路。」
Alton會不會拒絕看社交媒體？他說：「我有一排係停咗嘅，覺得算啦，曾經覺得佢冇益，但我𠵱家唔會用冇益嚟形容佢，因為佢的確反映緊𠵱家啲人嘅生態，的確反映啲人點樣睇一件事。啲人唔健康，你都要知道佢哋有幾唔健康，呢啲係你創作嘅靈感。有好多潮語，你自己唔用，都要聽得明。」
ENTER ENTER 是 ENTER into ENTERtainment，直入娛樂核心，娛樂不單是消閑，也可以認真去看，ENTER ENTER 會認真對待娛樂，看清娛樂。
https://www.facebook.com/enterintoenter/
https://www.instagram.com/enterintoenter/
https://www.threads.com/@enterintoenter