JFFT位於荃灣的辦公室今日（28日）發生火警，大批消防員趕赴現場灌救，幸好無人受傷，期間數十人自行疏散。JFFT隨即在IG向粉絲報平安，說「大家不用擔心 已處理 麻煩晒消防手足 單眼佬表示 人無事先可以做到世界冠軍 感覺少少似要步牙真後塵」，火災後，JFFT三子床哥、雞翼和米爺即返公司，並開live向粉絲展示災後情況。
只見公司內門口位置JFFT的logo燈牌左眼燒穿了，並燻黑了牆。床哥說：「我收到IG嘅DM，話我嗰度著火，我本身喺屋企張床度，即刻走去廚房，然後先至知studio著火，我都嚇一嚇，邊度咁惹火。原來火光熊熊就係『毒仔』左眼，跟住一路燒上去，好消息係公司入面冇影響。」米爺說：「我收到警察電話，問我知唔知道studio著火，交待完之後，就第一時間趕過來，嚟到嗰陣，消防已經救熄火。」幸好最後沒人受傷，只是水浸。
米爺續說：「今次係不幸之中嘅大幸，火燭嘅話，水喉應該灑水，可能溫度未到。」床哥說：「如果灑咗水，我哋應該處理唔到。」因沒灑水，公司的電腦沒被波及，米爺說：「一個鐘頭搞掂晒所有嘢，災後重建算係快！」一大排Figure櫃完整無損，床哥謂燒爛的logo ，已相約MC仁上來，用塗鴉方法修補，床哥說：「成幅牆都俾佢（MC仁）玩，玩埋個地下。」到晚上，MC仁真的親自上J台，把燒焦的地方，弄成藝術裝置。
試當真去年結業，游學修把公司的橫幅寄存在JFFT，今趟火燭，JFFT笑把責任歸咎這橫幅，床哥說：「呢塊嘢最惹火，惹火尤物！」雞翼說：「對上一次係佢哋（試當真）著火！」床哥說：「所以我哋要將聖火傳落去！」
跟着眾人謂要把試當真這橫幅送給小薯茄，他們即時致電游學修，阿修也同意：「佢肯要，我冇所謂呀，咁爭佢哋未燒，梗係俾佢哋。」結果小薯茄話事人高Ling真的和程人富來攞試當真橫幅，床哥和米爺還一路護送往小薯茄總部，由朱Mic和童童接收，十分搞笑。一場小火，結果牽涉YouTube三個大台，JFFT、試當真和小薯茄，真的始料不及。
ENTER ENTER 是 ENTER into ENTERtainment，直入娛樂核心，娛樂不單是消閑，也可以認真去看，ENTER ENTER 會認真對待娛樂，看清娛樂。
https://www.facebook.com/enterintoenter/
https://www.instagram.com/enterintoenter/
https://www.threads.com/@enterintoenter