有市民打上電台節目控訴護士「畢業即失業」嘅現象，行政會議成員張宇人質疑有關聽眾係「工會扮人打電話」，言論引起爭議。不過，張宇人似乎懶理被圍攻，接連去多間餐廳預早賀國慶。
張宇人嘅Facebook一連6個帖文都係去唔同餐廳探路，預告嚟緊會提供嘅國慶優惠。今朝佢去到一間港式茶餐廳預先品嚐將於10月1號推出嘅「我杯茶套餐」優惠，可以用30蚊享用經典奶茶或者鴛鴦，仲配上菠蘿油。
至於午餐，張宇人去KFC買外賣同同事分享，預告嚟緊國慶日，KFC會推出10蚊1件家鄉雞／香辣脆雞／狂惹香燒雞嘅優惠，話唔去買就真係損失啦！張宇人喺呢啲飲飲食食嘅帖文，冇回應最近嘅爭議。不過，佢喺帖文就開咗限制留言功能。 原文刊登於 AM730 https://www.am730.com.hk/本地/1055826/張宇人懶理被圍攻-光顧多間餐廳買炸雞預早賀國慶-ray-online?utm_source=yahoorss&utm_medium=referral