ENTER ENTER主持人何德第15集請來Dominic（何浩文）作嘉賓，Dominic近日再出新歌，他說：「原來我已經10年冇出歌，我中間都一直有唱歌，但冇練歌，冇好好認真對待音樂呢件事，現在會認真，想搵返一啲同溫層，所謂圍爐，認同我講嘢嘅人。」
Dominic續說：「現在係Threads嘅年代，養大咗大家心裏面嗰隻鬼，好多時候佢本人未必係咁。我出上一首歌，喺IG遇過有一個人叫我加油，話首歌好聽，同一日佢喺Threads插緊人，我覺得Threads令到人明顯再拆多一個人。我了解咗呢件事，就睇少咗Threads。我諗有一班人都清醒，我想搵清醒裏面又buy我嗰啲人。」
「我經歷過蓬勃年代嘅尾水，現在呢個年代唔同嘅地方，係自由度。現在free flow好多，喺Instagram見到你，會問你有冇興趣合作。呢樣嘢切合我人格，我𠵱家係舒服咗，但變相係要令我更加進取，因為我個人比較佛系。」
「我13、14年左右，我正正常常去拍戲做節目，有啲朋友去篤波，突然間有記者打比我，『你知唔知我哋有人跟緊你，佢話你好悶，淨係返工放工篤波，你會唔會去吓蘭桂坊行吓？你嘔啲嘢出嚟啦！』然後有一日我落樓，行出去見到有狗仔隊，原來真係有人跟我。跟住我打返個電話俾記者，同佢講：『Sorry，我見到你個同事，佢好似好驚我，辛苦佢，但我個人真係咁。』我唔會用側邊啲noise去博出位，唔鍾意嘩眾取寵，所以今日咁霉。其實我中途都錯失好多可以爭取嘅機會，呢兩三年先至真係會出去social吓，識多啲人，同啲唔同嘅人合作。」
「網上啲人話我半紅不黑，我冇感覺㗎啦，首先我一嘢打到自己最低先，睇吓你點可以再打得我低啲。」會否曾經介意？「以前梗係有啦，唔會當面，但私底下會覺得點解講啲咁嘅嘢，十年、八年前左右，以前包袱會重好多，有包袱就有自尊心，一有負面嘅嘢就係人哋唔啱，好少真正諗到點解佢有咁嘅觀感，係過程嚟嘅，現在睇得輕咗，自己會舒服啲。佢攻擊你，裏面有內容會用到嘅。」
原來Dominic是JFFT的粉絲，經常看J台，他說：「我噚晚仲睇床哥，佢哋都好多公關災難，你會睇到一啲公關災難係有人理，有啲冇人理，有人理嘅，點樣拆好件事，冇人理嘅，就過咗佢。現在呢個年代，大家都願意接受幕前嘅人，其實都係一個人，我更加可以拆下以前嘅偶包同面具，我現在自在好多，你可以搵返我以前嘅訪問，一隻字嘅粗口都冇講過，其實我會講㗎嘛。」
「我好鍾意J台佢哋，床哥都話有啲嘢冇乜大不了，觀眾覺得係咁，佢哋自己冇睇得咁重。其實有佢哋陪住大家，係好幸福。我認為喺娛樂呢個界別，有幾樣嘢係好幸福，第一係生存喺有陳奕迅嘅年代，第二我見到百花齊放嘅年代，第三個係J台。因為佢哋捱咗十年，先至有人去追捧。以前《笑談講粗口》年代，有人睇，但唔係好似𠵱家咁。我覺得keep住堅持，你就會走到出嚟。有人用咁多時間開直播去陪伴大家，係唔容易嘅事。我點解咁buy佢哋，因為我都係堅持緊一件事。因為除咗做幕前，我仲有教健身、教拳擊，我做production，如果唔係咁熱愛呢件事，我已經轉咗工。」
過往Dominic曾做過特約演員，「我記得試過拍一部戲，想返入休息室拎嘢，見到有人攞住我個袋，掉咗出嚟，我呆咗一陣。到要埋位，有人問個人茄喱啡喺邊，跟住有個演員指住我，我嗰刻好難受。嗰日到差唔多完嘅時候，我打返公司話唔撈，我嚟呢度係做演員，唔係做狗。唔係我做乜嘢位嘅問題，係respect嘅問題。」
Dominic演過電影《鴨王》，兩集都有份演出，「有好多演員做咗一世都未必有代表作代表，佢哋未必好容易有一個俾人記得嘅point，而我有。我現在喺呢個generation，我嘅出鏡率係低咗，但都有啲後生，Gen Z話睇過我部戲，佢哋唔係好意思講部戲名，我話：『講啦，鴨王吖嘛！』我又唔會話好proud，但我覺得絕對唔係負面嘅嘢，起碼有人記得先，好難㗎。」
https://youtu.be/rzNNPnIgTLA?si=gxJZCNU7utyXaFhG
https://open.spotify.com/episode/7JgXjIpkL0B8WbjJSNGoiw
「Topics by SpotiTalk」全新訪談podcast節目《ENTER ENTER》，主持何德帶大家直入歌影視世界，角度有趣但不八卦，深入而又雅俗共賞，ENTER into ENTERtainment。節目逢星期日，於Spotify及YouTube同步上架。