Son姐（張慧敏）日前在自己的YouTube 頻道《與SON對話》訪問鄧兆尊，問兆尊「但其實𠵱家都好似冇乜聽到祥嫂嘅消息」，完全不知祥嫂已經離世七年，被指事前沒準備不夠專業，是訪問的反面教材。
Son姐再接再厲，她訪問傅穎（現名傅寶誼）的片於本周二（29號）再出街，引來網民留言取笑，「好耐冇祥嫂消息，請問幾時請祥嫂傾吓」、「最近有冇祥嫂消息」。
訪問中Son姐問傅寶誼這個名是那時改，她說：「40歲，兩年前，想改好耐。但係我覺得自己以前好多掣肘，同好多包袱喺身上。覺得呢個名（傅穎）係我爺爺改，爺爺好早已經過世，呢個名一直都keep住用好耐，但其實我心裏，我知道對呢個名係有抗拒，到咗40歲，與其唔鍾意，點解一路要迫自己用落去？咁嗰下我就⋯⋯改啦！」
為何不喜歡這個名？「唔可以話用呢個名嘅時候都唔開心，但呢個名令我睇到佢嘅時候，我都覺得一定係負面嘅，因為我太多負面嘅新聞。加上我細個成日都俾人掉轉個名嚟讀，叫『穎傅』（泳褲），我細個好唔開心，好介意，點解唔叫我泳衣呢，泳褲係男仔着㗎嘛！所以我成日同身邊朋友講，如果你小朋友真係好唔鍾意自己個名，早啲改。」
「我自己睇傅穎呢個名嘅時候，聯想到一大堆是非，最大嘅問題係，其實我唔係一個好鍾意是非嘅人，但我喺大家心目中，已經變成一個好是非嘅人，『佢出嚟又製造是非』！我本身想改名，第一個諗到就係寶字，我好希望佢好似一份禮物，如果我出現喺你面前，我想係一份禮物嘅形式。」
在這娛樂圈不如意，有否想過離開？她說：「好多人問我呢個問題，俾人排擠就俾人排擠，唔開心就唔開心，但工作就係工作，以前我都講唔出點解係咁樣。但係你有冇玩過MBTI測試？我發現有一種人就係咁樣，我係INTP，一個T人可以分得好清楚，我工作就係工作，我係理智行先嘅人，我唔會因為做得好唔開心而離開呢個地方。」
「我以前從來冇諗過唔開心，就要去搵開心。我將我嘅開心擺得好低，我寧願喺一個好唔開心嘅環境。你幻想吓日日出嚟做嘢嘅時候，冇人同你講嘢，冇人理你，其實你心裏面一路唔開心，我冇強大到諗『你唔理我就唔理我，我都唔理你哋』，我未去到呢一種性格，咁我就成日好似遊魂咁。但我又要日日喺度返工，所以我有一段好長嘅經歷係咁樣，精神狀態係好有問題。就算呢幾年我做帶貨直播，我其實都已經好攰好攰，但都會有一把聲音同我講，『喂，做啦！』。」
「就算我係一個好I嘅人，中學一年級我會參加歌唱比賽，每一次喺預賽我都OK，但一上到台我都會發台瘟，其實你要一個I人喺台上表演，佢要衝破好多心理關口。但你現在問我，我知我自己係唔適合呢個圈，但我又好鍾意演戲，我又好鍾意創作，出書同畫畫我都鍾意，但我唔識去handle呢個圈太複雜嘅人事。」
傅穎曾謂多年沒再拍拖，她說：「有人追，但我冇接受。我覺得多咗好多時間獨處，內心平靜，我現在面對事情時候，唔會好似以前咁騰雞同緊張。」
「我成個歷程都係negative（負面）嘅人物，所以好多negative嘅嘢都可以擺喺我度。我以前間公司，可以同我講：『阿邊個唔得，但妳可以！』，因為之前有一啲gossip或者負面嘅形象喺我度，佢再安排啲嘢落去，大家唔會質疑，大家都會相信Theresa係咁樣。所以我睇外間講Theresa呢個人，我覺得唔係我，係另一個人。」
「我從來都冇講過自己放下，好多人覺得一個學佛嘅人，一定要做到放下，學佛就要情緒好穩定，我一路都講一樣嘢，情緒係每個人都會有。我哋都會有情緒，我哋可以覺察到自己嘅情緒，覺察到嘅時候，就唔會俾自己去衝動做一啲嘢，但唔代表你乜嘢都要放下，你點可以唔記得一個人點樣去傷害你？我已經逃離咗嗰個時段嘅自己，但唔可以話我唔記得咗，唔可以話呢件事冇發生過。」
「啲人成日話妳再提，即係未放下。如果我未放下，當人問我，我係要一直講大話：『其實我冇乜嘢，以前冇受任何傷害，冇喺心入面。』我覺得呢啲係bullshit，喺度講大話。」
ENTER ENTER 是 ENTER into ENTERtainment，直入娛樂核心，娛樂不單是消閑，也可以認真去看，ENTER ENTER 會認真對待娛樂，看清娛樂。
https://www.facebook.com/enterintoenter/
https://www.instagram.com/enterintoenter/
https://www.threads.com/@enterintoenter