旺角鬧市玩命！網上瘋傳3段驚險到爆的影片，直擊有人竟然在人來人往嘅奶路臣街馬路中心，僅用3條帆布帶吊起一部重約100磅的大型冷氣機組件上簷篷，整個過程「吊吊揈」。
現場在奶路臣街近洗衣街20號啟賢大廈。片中所見，5名「大隻佬」站在1樓簷篷邊緣，下面馬路則有2名男子扯住一條吊重用的帆布帶，將一部大型冷氣機組件「凌空吊運」，組件則綁上兩條帆布帶，全程冇棚架、冇吊車、冇安全帶。
冷氣機在半空搖搖欲墜，期間有工人失控大嗌「唔好放手呀！」，場面驚險萬分。一班人左拉右扯，最終勉強拉到上簷篷，上面工人即刻揮手大嗌「唔該晒！」鬆一口氣。
冷氣機當時就懸在馬路同行人路上空，下面為馬路與行人路，萬一手滑、繩斷，整部機跌下隨時變殺人兇器。片中見到途人紛紛遠觀，車輛不敢駛過，但整個過程完全沒有有圍封、雪糕筒及警告牌。
影片未有交代事件發生日期，但已經在網上炸鍋，網民鬧爆：「拍戲咩？唔會有人咁癲啩！」、「好危險！跌落嚟就大鑊喇！」、「為咗慳返架吊車錢，搬X死人哋個仔呀！」
更有行內人直言，「為咗慳幾千蚊吊車費，用人命較飛，認真離譜，勞工處同執法部門應否介入徹查。」。
原文網址：旺角鬧市7漢變身「人肉起重機」 3條帆布帶吊起冷氣機組件上簷篷 | on.cc東網 | 中港台 https://hk.on.cc/hk/bkn/cnt/news/20261004/bkn-20261004003604627-1004_00822_001.html