究竟小野這個名，從何而來？他說：「時間要撥返去二十四年前，2002年日韓世界盃，嗰陣我中學踢波，咁啱嗰個夏天剷咗skin head，同當年日本國腳小野伸二好似樣，跟住個個係咁嗌，叫吓叫吓到現在。我冇英文名，有改過，但冇沿用統一嘅英文名，阿業又好似唔啱數。小野啲人以為係花名，我又唔當佢係藝名，正式場合會用全名，但私底下會嗌小野。」
小野的新片《廚師發辦》，主角用dating app以煮飯結識女性，這方法現實中是否行得通？他說：「呢個世界無奇不有，想像中難去搵食呢一餐飯嘅人，做乜要食你煮嘅嘢，去餐廳易啲。」但其實原來小野自己確實有這個經歷，他說：「我年青時都試過喺網上展開對話，嗰時唔係dating app，係Facebook，我哋約出嚟食飯，佢話想食秋刀魚，後尾去咗我studio食，我煮咗一餐飯，大家一齊食。我覺得呢個感覺係唔同餐廳食。」
結果如何？小野說：「我哋嘅ending係一齊咗，其實係可以，但唔係個個願意食你煮嘅嘢，要睇緣份。」小野謂自己說話有兩種模式，他說：「我有兩個mode，二人相處，我會願意多講嘢。二人以上，我好容易會唔講嘢，鍾意聽，多人同少人嘅自我呈現會唔同。」
小野入電影圈，最初是做幕後，他說：「開頭做幕後因為讀嗰啲嘢，但亦有人叫過我演學生作品，亦做過港台劇集，初嘗演員滋味，幾過癮。到2014、15年，開始覺得幕後不適合，導演需要同好多人溝通，但我唔鍾意同人講咁多嘢，未必適合去manage一隊crew，同演員溝通戲劇都唔識。後尾轉去做演員，係想學吓其實點同演員講戲，聽導演講取下經，慢慢變咗成個路線喺演員發展。」
遊走於幕前和幕後兩種崗位，是利還是弊？小野說：「橫跨咗四、五年，唔知點定位。我會珍惜嗰時嘅拍攝經驗，主要係短片同MV，一年演員嘅工作係十日之內，其餘三百幾日，有得做crew就做crew，返cafe就返cafe，教書就教書。」
那時小野演出學生作品，還會減價，他說：「我自己喺嗰度嚟，當時係2015年，學生儲錢好辛苦，我當時係收500蚊一日，3000蚊封頂，我唔會喺學生作品搵錢。」
小野有一種斯文的氣質，特別適合演這類角色，他說：「斯文，但有擴展性，有趣係談善言所講，我係斯文敗類專業戶。斯文敗類作為斯文嘅擴展，都幾好，有兩面性，作為演出者，係幾好玩嘅旅程。」小野笑謂：「佢（談善言）直頭講人渣專業戶！」
小野的女友廖子妤也是演員，二人怎樣相處？他說：「我哋兩個人相處，唔係用演員作為大前提去理解對方，我哋會鍾意睇旅遊資訊，都會煮吓嘢食，屋企有養貓，都係幾日常嘅生活。」
https://youtu.be/iAlFxA0eeE8?si=V8pBSzIGSEWBdd9c
https://open.spotify.com/episode/3nFsF3hJ2pUqnsJJG740Zh
@spotitalk @topicsbyspotitalk @hotak1999 @siuyea_lo
「Topics by SpotiTalk」全新訪談podcast節目《ENTER ENTER》，主持何德帶大家直入歌影視世界，角度有趣但不八卦，深入而又雅俗共賞，ENTER into ENTERtainment。節目逢星期日，於Spotify及YouTube同步上架。