鄒凱光、余迪偉和阿Bu主持的YouTube節目《三叔公園》，將於10月在旺角麥花臣搞6場Talk騷《膠級大人》，門票早前公開發售，由於銷情欠佳，近日他們大力催谷，周一（24號〉晚直播節目中，三人谷飛的言論惹爭議，引發公關災難。
當晚有聽眾表示自己10月可能不在港，不知能否出席Talk騷，余迪偉說：「萬一真係唔喺香港，俾朋友嚟。」阿Bu即說：「唔使俾朋友，吉咗佢，真係唔使俾朋友。」余迪偉再說：「你話買飛㗎，你唔買天譴！」這番言論，令網民大為不滿，直指他們食相太難睇。
結果今晚（26號）的直播節目一開始，三人即回應網民指責，阿Bu說：「關於呢一兩日爭議，有幾點回應。第一，天譴論，要澄清唔係灘叔講。」余迪偉即說：「好明顯係講笑，但報道非常唔正確，亦好斷章取義，天譴大大標題話灘叔講，其實係我講。」
阿Bu續說：「第二，吉位爭議，叫人買咗飛就OK，唔入場都唔緊要，其實係講笑。作為表演者，唔會想大家唔嚟，只想多人睇我哋，點會想吉位，呢個係講笑，可能講得唔係咁好。」
「第三，食相問題，不停谷飛，自己channel sell自己飛，我完全唔覺得有問題。飛真係要賣，我哋唔係賣得咁好，滯銷中，所以唔好意思，跟住嘅日子，我都會繼續谷飛。」
阿Bu接着再說：「無論我哋三個同觀眾們都唔同咗，可能喜好、心情、需要唔同咗，有啲以前啱聽，𠵱家變得唔啱聽，其實真係唔緊要，以下呢句，我唔係發晦氣、單打、串，我好衷心講，其實你覺得唔啱聽，真係可以唔聽，我哋當初做呢個channel，係想大家開心，你聽得開心，我哋又做得開心係最理想，如果聽得唔開心，做乜咁辛苦留喺度。」
「其實世界有好多選擇，唔想你聽節目唔開心，我都會替你不值。曾經係園賓、觀眾，我都想你記得，以前鍾意，現在冇咁鍾意，如果有日想聽返，啱聽就聽，唔啱聽就轉台，唔使太上心。」
ENTER ENTER 是 ENTER into ENTERtainment，直入娛樂核心，娛樂不單是消閑，也可以認真去看，ENTER ENTER 會認真對待娛樂，看清娛樂。
https://www.facebook.com/profile.php?id=61590635431086
https://www.instagram.com/enterintoenter/
https://www.threads.com/@enterintoenter