魏浚笙（Jeffrey）、鄭秀文（Sammi）、倪晨曦、邱彥筒、譚旻萱、林家熙、陳漢娜、歐鎧淳等昨日（28日）到中環出席品牌活動，吸引大批fans到場。Jeffrey表示活動前與不同歌手拍攝《易出之物》的宣傳，期間獲一位歌手提點要剃毛，所以專程剃乾淨胸毛才出席活動。
他說：「我嚟之前，有啲人以為我有啲頭髮喺身度，本身無剃嘅，經過佢提醒之後，加上又要好大方，就剃一剃。我驚品牌以為件衫唔同design。」問到他最想邀哪一位歌手拍片宣傳，他坦言希望跟張學友合作，「成家人都好鍾意，由細到大！我有去睇佢演唱會大嗌學友！」
對於《浪花男女》導演馮志強指Jeffrey零片酬接拍之餘，更出面幫手搵贊助，他說：「搵sponsor一定有，我覺得成套戲大家都好辛苦，幫得就幫，冇計錢銀上嘅嘢，冇特登去計算，有唔同品牌去sponsor，我已經好開心！（冇收到片酬？）我覺得最重要係部戲開到，大家好熱血咁樣完成一部作品，我覺得已經好足夠！成個過程都拍得好愉快！（你接嘅時候都已經知道資金有困難？）依家部部戲都資金有困難，都希望大家有工開，自己又有工開！總之細又細做，但有大做大！」
原文刊登於 AM730 https://www.am730.com.hk/娛樂/1050140/jeffrey剃胸毛以deep-v上陣-認零片酬兼幫手搵贊助拍-浪花男女-?utm_source=yahoorss&utm_medium=referral