香港賽馬會為社區籃球計劃舉行啟動禮，主禮嘉賓包括姚基金創辦人姚明，一現身當然吸引好多人「集郵」，文化體育及旅遊局局長羅淑佩都忍唔住分享。
姚明官方身高係2米26，個個企喺側邊都會呈現明顯嘅身高差。羅淑佩喺社交平台分享同姚明嘅同框合照，話：『初見姚明，終於領略到「哈比人」視覺』。
馬會今次透過慈善信託基金審批撥款逾1.34億，支持為期5年嘅賽馬會「傳承接力」社區籃球計劃。計劃會善用馬會同姚基金嘅合作基礎，為4,600名6至16歲人士提供為期9個月嘅籃球訓練，特別針對因為經濟同社會因素，而較少機會接受正規訓練嘅年輕人。
羅淑佩喺啟動禮上致辭，話體育唔單止著重提升運動員嘅競技水平，仲係促進身心健康嘅重要基石，對凝聚社會、發放正能量有關鍵作用。佢深信今次計劃有助喺社區推廣優質籃球培訓，等更多年輕人受惠。政府亦將繼續投放資源，推動香港體育嘅全面發展。
原文刊登於 AM730 https://www.am730.com.hk/本地/1051869/羅淑佩-初見姚明-終於領略到哈比人視覺-ray-online?utm_source=yahoorss&utm_medium=referral