Winka說自己是一個E人，她說：「我入行前更加E，extrovert個比例去到八十幾，入行後反而drop咗，中間囉。」為何會跌下去？她說：「大部份嚟自教訓，唔同場合都要適當control番自己hyper嘅程度。喺中間位，進可攻，退可守。」
Winka續說：「我哋Collar全部人，得我一個人係E，就咁望，都唔係好覺。」哪位成員會想像到不應該是I？她說：「Gao Gao係I，但大家應該想像唔到佢係l，因為佢好識得講嘢，其實Marf都係l，佢𠵱家做訪問，會更踴躍過我哋好多個人，佢哋都識得點樣去平衡。」
近日Winka推出個人新歌《好好照顧自己》，找阿Gao負責MV 的幕後拍攝及剪接工作，Winka說：「今次同阿Gao合作，似返自己做個人project嘅感覺。」結果她們一日內就完成MV的拍攝和剪接，而Winka更擔任MV導演一職，「今次導演主要係我自己，想點拍，呢首歌想講乜，我想用memo紙貫穿成個MV。阿Gao係一個令我好安心嘅人，佢喺度嘅時候，有好放鬆嘅感覺，完全唔覺得係拍緊MV。」
「阿Gao好知道我哋每個女仔靚嘅位喺邊，所以成個MV好唔同平時作品，佢觀察力好高，但又唔會擺隊長嘅架子，佢比較似一個同妳同行嘅人，好似一個家姐睇住我哋。」
以往Winka講說話或許太直接而受教訓，她說：「成長係必經嘅階段，我學到嘅嘢，係保護人哋同保護自己，嗰陣時用錯詞語，講咗啲嘢，你會忽略咗原來你係一個公眾人物，有公眾責任。現在講嘢會諗多一層，講呢樣嘢有冇造福到人哋。」
Winka說：「有段時間我收到一大箱嘅信，我都冇睇到，我唔想睇，我好驚唔知講啲乜嘢，但當我get over咗，睇返嗰啲信，原來都係擔心我。有段時間我做團嘅工作都吃力，每一次上台，會諗下面有幾多人唔鍾意我，呢啲內耗其實係好蠶食，去到後期有好多唔同嘅人同信仰都幫到我，我知道唔使喺呢個loop嗰度停留。」
Winka和男友朱芸編會否有音樂上的合作？「我哋分得好清，我諗佢同我，大家都有一個共識，唔想因為大家嘅關係，而得到乜嘢機會，觀眾角度嚟睇係好敏感。我哋嘅愛情，大家祝福就可以，我哋嘅工作，就係分開嘅。我哋大家好刻意避忌，日常生活IG都唔會特别po佢。」
兩人最夾是什麼地方？Winka說：「啱key位係我哋嘅信仰，當時我入咗個fellowship，係王君馨帶我入去，阿Wan即係我另一半，佢亦都係呢個fellowship，佢當時忙緊第二套戲，我返fellowship嗰陣冇同佢碰過面，有一日王君馨話有一個弟兄（朱芸編）受浸，妳想唔想嚟感受呢份祝福，我就去咗睇，好受感動，呢個緣份好得意，信仰令我哋好啱傾。日常食飯我哋都會講神，講聖經嘅嘢。同埋大家都係差唔多行業，時間表上會多啲理解。而大家又鍾意做音樂，佢鍾意做音樂，我又鍾意唱歌，呢啲係我哋日常生活好啱嘅原因。」
https://youtu.be/PPE7XKOiD5Q?si=ZxWqFfJgIV6Ob-OZ
https://open.spotify.com/episode/7nM4MkrH96T8sN97OwzrHW
@SpotiTalk @topicsbyspotitalk @hotak1999 #winka陳泳伽
「Topics by SpotiTalk」全新訪談podcast節目《ENTER ENTER》，主持何德帶大家直入歌影視世界，角度有趣但不八卦，深入而又雅俗共賞，ENTER into ENTERtainment。節目逢星期日，於Spotify及YouTube同步上架。