陳志雲日前接受渾水的SpotiTalk訪問，剖白他七年的官司歷程，又談及在無綫和商台的工作。陳志雲在無綫時期主持《志雲飯局》，會因職位的關係而易些約人嗎？他說：「可能大家話嗰陣你係總經理，搵邊個都得，梗係唔係啦，好多人推過我。有啲唔係直接推我，佢哋好叻㗎，譬如朱玲玲，嗰陣佢應承，但佢話唔想講呢樣，唔想講嗰樣，淨係想focus on photography。咁好呀，不如等你第日feel free嗰陣，我哋再傾過。」
志雲續說，「我嘅訪問係好free flow，個script係喺我個腦。如果嘉賓有concern唔想提嘅嘢，可以提出，我通常都會跟。但有啲好好，傾傾吓原本話唔提嗰啲，佢自己講埋。」
「唔知點解出面有啲朋友有個印象，話我問嘅問題好尖銳，其實唔係，冇乜特別。最近有個經驗，我想搵蔡少芬做訪問，佢好有禮貌，經理人覆我，話近期佢同先生張晉都喺大陸忙緊，有機會再做。咁點知佢湊小朋友去學嘢嗰度，樓下有間咖啡室，個老闆係我朋友，佢話蔡少芬邊係唔得閒，噚日先至同小朋友嚟。原來佢同我朋友話，我問嘅問題好尖銳，唔敢俾我做訪問。傻女嚟㗎，點會呢，傾偈咋嘛。」
怎看電視台的山頭主義？「我唔係直接做製作嘅人，又唔係管理藝人嘅人，製作部同藝員部有冇呢啲山頭，我話俾你聽冇，都係講大話。係咪一件壞事，又未必，因為好自然，拍開檔嘅人，你熟悉，我知道嗰個人做乜嘢好。」
「有啲唔健康嘅現象係有出現嘅，例如我負責一組劇集，你負責一組劇集，某藝員我用開，但另外一組又覺得啱用，你想搵佢做，咁用開嗰個藝員嘅山頭就出現，嗰啲大佬大姐話：『你過去吖，我以後都唔用你，你過去就唔係我嘅人』，諸如此類，未必講到明，嗰啲就係唔好嘅山頭主義。」
「亦都試過開會嗰陣，見到藝員部同製作部為啲獎嘅問題，拗到面紅耳熱，都係山頭，話係我嘅人點解你唔俾佢呀。」
發生ICAC事件後，遇到大難臨頭各自飛，還是人性光輝？志雲說：「兩樣都有，大部份都係光芒多過黑暗。十隻手指數埋，一、兩個點都有，但我都係理解，因為你都仲喺公司做嘢，你都要理吓自己飯碗，即刻割蓆完全明白同理解，冇hard feeling。」
問到志雲怎看商台同事阿正年賺500萬，他笑說：「我點睇呀？我妒忌啦。商台比較多新人冒出，佢哋風格肯試。阿正嘅特質係有爆牙，佢image好清晰，喪玩、真情，佢個腦又轉得快。仲有一樣冇得講嘅，係人緣，人哋鍾意你。我都試過喺電視台，唔講名啦，某女藝員我哋睇好可以捧，靚㗎，咁多年來好少見咁靚，但唔得，可能因為佢太靚，啲女人唔鍾意。」
ENTER ENTER 是 ENTER into ENTERtainment，直入娛樂核心，娛樂不單是消閑，也可以認真去看，ENTER ENTER 會認真對待娛樂，看清娛樂。
https://www.facebook.com/enterintoenter/
https://www.instagram.com/enterintoenter/
https://www.threads.com/@enterintoenter