麗英的新歌MV《陪多我半日好嗎》，找來KK張國強演出一角，做麗英的爸爸，對此麗英說：「真係好有緣份，因為MV製片同KK合作開，我哋想要爸爸角色，佢話不如試吓KK。KK我由細睇到大，佢之前冇參與過MV，將第一次俾咗我。」
KK和麗英的相處十分有趣，她說：「睇開佢以前做奸角，原來佢個人好nice好sweet，因為面對前輩好緊張，但佢嗰日係咁同我傾偈，講星座，佢問我什麼星座，我話係人馬，原來佢都係，大家講人馬座嘅特點，都係自由自在。」二人還有共同興趣，麗英說：「佢好鍾意食字，但有時食字會俾人歧視，食得唔好會kam。嗰日係前所未有一次咁暢快，大家互相食字，好開心，沉醉喺人馬座世界，超夾。」
麗英在小薯茄出道，提起這個家，她很感恩：「好開心，有諗過小薯茄可唔可以做一世，我OK 㗎，我真係願意做一世，我冇想像過嘅嘢，都喺小薯茄發生咗。冇諗過喺度做歌手，出外訪問荷李活巨星，好夢幻嘅體驗，好幸福。大家一條心，有一百分嘅熱情，我希望小薯茄可以再耐啲。」
提起小薯茄，麗英特別有感覺，她說：「有少少感動，YouTube都難做，未必好穩定，我哋公司好多人，點都有一定壓力，我哋會努力堅持。就算我哋可能冇以前咁多人睇，都會繼續做。好似唔做歌手，都會唱歌，我希望越做越好。」
在小薯茄做過多次「雪櫃冷笑話」，那次最有印象？麗英說：「我覺得係安妮夏菲維，《穿PRADA的惡魔2》，梅姨同Anne。我睇《穿PRADA的惡魔》大，啲嘢好靚，第一次見到佢哋真人，覺得超級緊張同興奮。啲女演員真係勁，尤其梅姨，已經做咗好耐，仍然好有活力。我哋講笑話，佢會一齊玩，接你啲嘢。我老咗都要咁後生，想成為好似佢咁嘅女演員，無論幾多歲都咁有活力。同佢哋交談，會feel到佢哋係好有自信嘅人，係歷練嚟，印象好深刻。」
小薯茄的四個男幕前，程人富、阿J、肥蚊和朱Mic，如要選擇，哪個做老公？哪個做男友？麗英笑說：「少嘔心！老公⋯⋯如果撇除所有外表，肥蚊做老公幾好，因為肥蚊好叻煮嘢食，好識照顧人，食完飯唔記得扔垃圾，佢會幫我，好溫柔咁提妳：下次要扔返呀。又或者冷氣凍，佢會問使唔使着褸，會留意好微細嘅位。」
「最重要肥蚊煮嘢食好叻，有一次佢請我哋成班人去佢屋企食飯，好有屋企感覺，十分好客，好肯serve人，做佢老婆幾幸福，會被照顧得好好，肥肥白白。肥蚊係好男人嚟㗎，只係俾啲脂肪覆蓋咗。最好佢唔係獨食，肯share俾大家食。」
那麼男友會揀誰？麗英說：「其實又係撇除個樣，我諗J哥。J哥係好嘅男朋友，唔好講日後結婚，純粹開心同男朋友拍拖。J哥會揸車周圍去，有時會約下我哋去沙灘玩，所以做佢女朋友唔會悶。佢又好肯試，咁多男仔之中最大膽，如果有過山車，佢會第一個衝去玩，同佢一齊好有刺激感覺，《天若有情》阿J版！」若果純粹揀樣，她說：「肯定係富哥，最靚仔，但富哥已經結咗婚。」
假設有四個大台給她選擇，JFFT、Fh production、香城映畫和毛記電視，她會加入哪一個台？麗英不用想即說：「呢個問題唔使諗，我會揀JFFT，俾佢哋荼毒太深，現在講嘢會師兄、師姐。佢哋感染力好強，現在做緊一件幾好嘅事，開live好攰，佢哋主力係live，唔係拍片咁簡單，佢哋on air同大家傾偈，係幾偉大嘅事。」
「尤其床哥心事台，大家有好多情緒受困唔開心嘅嘢，同唔到身邊人講，打上去同床哥傾，床哥接住晒大家，好偉大。翼Sir都係同大家唱歌玩吓，佢哋四個都係，陪伴係好緊要，J台做到呢樣嘢。」
https://youtu.be/Zb4DnoqUK7E?si=CIWRkgeI2Glfntq2
https://open.spotify.com/s/JYFUS4G
@spotitalk @topicsbyspotitalk @hotak1999 @laiyingdesu
「Topics by SpotiTalk」全新訪談podcast節目《ENTER ENTER》，主持何德帶大家直入歌影視世界，角度有趣但不八卦，深入而又雅俗共賞，ENTER into ENTERtainment。節目逢星期日，於Spotify及YouTube同步上架。